Umpama & Umpasa Ni Batak.

 Pinda Huta.

Pidong sitapitapi, habang diatas hauma
Horas ma hamu na hupaborhat hami
Horas hami na tininggalhonmuna

 Dolok ni Panampahan, tondongkon ni Tarabunga
Sai horas ma hamu dipardalanan songoni sahat tu inganan

 Tombak ni Sipinggan di dolok ni Sitapongan
Di dia pe hita maringanan, sai tong ma hita masihaholongan

 Eme sitambatua parlinggoman ni siborok
Amanta Debata do silehon tua, sai luhutna ma hita Horas diparorot

 Mangerbang bungabunga, ditiur ni mata ni ari
Selamat jalan ma dihamuna, selamat tinggal ma di hami.

 Umpasa Batak Mangadopi Natua-Tua

Umpasa Batak sidohonon molo dohot iba mangadopi natua tua na manjalo sipanganon  sian angka anakkonna

 

Andor halumpang ma togutogu ni lombu dohot togutogu ni horbo

Sai saur ma hamu leleng mangolu paihut ihut pahompu sahat tu na

Mar nini dohot mar nono

 

 

Tinpu bulung ni sabi nibutbut pinaspashon
I dope na tarpatupa hami ba i ma jolo tahalashon

 Hata sian undangan tu natua tua i: 

Poltak bulan i Ama ni Manggule: 
Ro nuaeng angka pomparanmu mamboan sipanganon ba dohot hami mauliate

 Tubu ma singkoru di dolok ni Simamora
Sai torop ma anak dohot boru na basa jala sisubut roha

 Tubu dingindingin jonok tu simartolu
Horas ma tondi madingin pir,,ma, nang  tondi matogu
Sai ro ma nipi na uli sai leleng hamu mangolu
Haliangan ni nono dohot nini raphon anak dohot boru

Hata ni undangan tu ianakkon na mamboan sipanganon                                            

Binolus Purbatua laho tu Parsingkaman
Naburju marnatuatua ingkon sai dapotan pandaraman

Laho pe  mangula sai na dao ma angka parmaraan
Sai dapot ma niluluan jala sai jumpang na jinalahan

Taringot di sipanganon na binoanmuna tu natuatua i :

Disi do gandina, disi do nang gandona
Disi do daina disi do nang tabona

Sirsir ansimna jala hona dohot asomna
Asa dohonon nami ma :
Bagot na marhaltoma na tubu di robean
Horas ma hami na manganton, lam martambama sinadongan di hamu na mangalean

Ia siula tano do hamu ba on ma dohononnami :

Binanga ni Sihombing ,binongkak ni Purbatua
Tu sanggar ma amporik ,tu lombang ma satua
Sai sinur ma pinahan gabe na niula muna

Molo partigatiga do hamu ba on ma dohonon nami :

Tinampul bulung bira bahen saong laho tu ladang
Sai mangomo ma hamu sian tigatiga ba,mangomo nang, sian dagang

 Molo tung sipata rugi hamu ba sai dapot nian nidok ni umpasa :

Soban rantingranting soban ni Sijamapolang
Ba molo rugi hamu sian antinganting, ba sai mangomo ma sian golang

 Molo pegawai do hamu ba on ma dohonon nami :

Tinapu bulung salaon dongan ni bulung si tulan
Ba sai naek pangkat ma hamu ganup taon, sai tamba gaji tiap bulan

 Na so marhot ripe dope on ma dohonon nami:

Parik ni Lobutua hatubuan ni bulu duri
Na burju marnar natuatua sai naingkon dapotan rongkap ni tondi.

 Ba angkup ni i :

Molo adong disi hulingkuling sai adong ma disi holiholi
Molo adong disi na so muli sai adong do rongkap ni tunaso mangoli

 Sahatsahat ni solu ma sahat di rondang ni bulan
Sai leleng ma hamu mangolu jala sai dipasupasu Tuhan

Hata Poda Tu Hela dohot Boruna.

Hata poda dohot pasupasu sian parboru tu hela dohot boruna

Parasaran ni misang tombak nirobean

Sai masiamin aminan ma hamu

songon lampak ni pisang
Jala marsintungkol tungkolan songon suhat di robean

 Aek sihoruhoru di toru ni dolok martimbang
Rap mangalangka ma hamu ia tu toru, songoni nang  tu ginjang

Napuran ni Lumbanjulu tu gambir ni Pahae
Rap Mangalangka ma hamu ia tu julu
Rap mangambe ia tu jae

Tu ho Boru hasian dohononhu ma:

Molo ogung na mabola, pintor dipaboa do luhana
Molo parumaen na marroha pintor dibuat do roha ni simatuana

 Sibigo ambaroba rara hulinghuling na
Gabe lamu uli do rupa  asal ma lambok pangkuling niba

Angka Umpasa Pasupasu :

Tubu ma singkoru di lambung ni tandiang
Sai tibu ma hamu marurat tu toru jala  marbulung nang tu ginjang

 

Na hinunti hirang marisi gadong sipapua
Badanmuna ma na so sirang sahat tu na saurmatua

 

Tinampul bulung salak laos hona bulung singkoru
Sai tibu ma hamu pa abing abing anak jala tibu mangompa ompa boru

Horbo ni sibuluan manjampal di balian
Sai manumpak ma di hamu Tuhan, Sai tiur nang pansarian

 

UMPASA MANJALO TINTIN MARANGKUP
Bulung namartampuk, bulung ni simarlasuna,
Nunga hujalo hami tintin marangkup,
Dohonon ma hata pasu-pasu.

Hot pe jabu i, tong doi margulang-gulang
Sian dia pe mangalap boru bere i, tong doi boru ni Tulang.

Sai tong doi lubang nangpe dihukkupi rere,
Sai tong doi boru ni Tulang, manang boru ni ise pei dialap bere.

Amak do rere, dakka do dupang,
Anak do bere, Amang do Tulang.

Asing do huta Hullang, asing muse do huta Gunung Tua,
Asing do molo tulang, asing muse do molo mar  simatua.

UMPASA TU NA BARU MARBAGAS
Dakka ni arirang, peak di tonga onan,
Badan muna naso jadi sirang, tondi mu tongtong marsigomgoman.

Giring-giring ma tu gosta-gosta, tu boras ni sikkoru,
Sai tibu ma hamu mangiring-iring, huhut mangompa-ompa anak dohot boru.

Rimbur ni Pakkat tu rimbur ni Hotang,
Sai tudia pe hamu mangalakka, sai tusima hamu dapot pansamotan.

Dekke ni sale-sale, dengke ni Simamora,
Tamba ni nagabe, sai tibu ma hamu mamora.

Sahat-sahat ni solu, sahat ma tu labuan,
Sahat ma hamu leleng mangolu, jala sai tongtong di dongani Tuhan.

Sahat solu, sahat di parbinsar ni ari,
Leleng ma hamu mangolu jala di iring-iring Tuhan ganup ari.

Mangula ma pangula, dipasae duhut-duhut
Molo burju marhula-hula, dao do mara rodi marsundut-sundut.

Ruma ijuk tu ruma gorga,
Sai tubu ma dihamu anak na bisuk, dohot boru na lambok marroha.

Balintang ma pagabe tumundalhon sitodoan,
Arimu ma gabe molo hamu marsipaolo-oloan.

Gadu-gadu ni Silindung, tu gadu-gadu ni Sipoholon,
Sai tubu ma dihamuna anak na bisuk, dohot boru sipangalean.

Andor hadukka ma bahen togu-togu ni lombu,
Sai sahat ma hamu saur matua sahat tu na patogu-togu pahoppu.

UMPASA MANGAMPU
Bulung ni Taen tu bulung ni Tulan
Ba molo tarbahen, sai topot hamu hami sahali sabulan,

Molo so boi bulung ni tulan, pinomat bulung ni salaon,
Ba molo so boi sahali sabulan, pinomat sahali sataon.

Ni durung si Tuma laos dapot Pora-pora.
Molo mamasu-masu hula-hula mangido doi sian Tuhan,
Napogos hianpe iba, boi do gabe mamora.

Songgop si Ruba-ruba tu dakka ni Hapadan,
Angka pasu-pasu na ni lehon muna,
Sai dijangkon tondi mai dohot badan.

Mardakka Jabi-jabi, marbulung ia si Tulan
Angka pasu-pasu na pinasahat muna,
Sai sude mai dipasaut Tuhan.

Naung sampulu sada, jumadi sampulu tolu,
Angka pasu-pasu pinasahat muna,
Sai anggiatma padenggan ngolu-ngolu.


Turtu ma ninna anduhur, tio ninna lote,
Angka pasu-pasu pinasahat muna,
Sai unang ma muba, jala unang mose.

 Naung sapulu pitu, jumadi sapulu ualu,
Angka pasu-pasu pinasat munai hula-hula nami,
Diampu hami ma di tonga tonga nijabu.


Habang pidong sibigo, paihut-ihut bulan,
Saluhut angka na tapangido, sai tibu ma dipasaut Tuhan.

Obuk do jambulan, nidandan ni boru Samara
Pasu-pasu na mardongan tangiang sian hula-hula,
Mambahen marsundut-sundut  soada mara.

Tinapu bulung nisabi, baen lompan ni pangula
Sahat ma pasu-pasu na nilehon muna i tu hami,
Sai horas ma nang hamu hula-hula nami.

Suman tu aek natio do hamu, riong-riong di pinggan pasu,
Hula-hula nabasa do hamu, na girgir mamasu-masu.

 UMPASA NI NAPOSO BULUNG.

 Jolo tiniktik sanggar laho bahenon huru-huruan,
Jolo sinukkun marga asa binoto partuturan.

Manuk ni pealangge hotek-hotek laho marpira
Sirang na mar ale-ale, lobianan matean ina.

Silaklak ni andorung tu dakka ni sila-sila,
Ndang iba jumonok-jonok tu naso oroan niba.

Metmet dope sikkoru da nungga dihandang-handangi,
Metmet dope si boru da nungga ditandang-tandangi.

Torop do bittang di langit, si gara ni api sada do
Torop do si boru nauli, tinodo ni rohakku holoan ho do

Rabba na poso, ndang piga tubuan lata
Hami na poso, ndang piga na umboto hata.   www.targetnews.co.id

Versi cetak